借书
报道时间:2022-01-05
来源:信息时报

话广州

唔经唔觉,广州图书馆开张已经40年了。如今,广图注册读者超过240万,服务市民超过1.3亿,早已成为大家所熟悉嘅知识宝库。

而家去广图,可谓相当方便。只要攞个身份证去办证机度一"",登记资料,借书证就自动办成。从此,你想上门借书又得,想图书馆寄过来又得,只须喺电脑度打几下,回车——得咗。

换着喺40年前,呢一切又点会咁方便啊?嗰时,想去图书馆借书系需要资格嘅——必须从事一定嘅知识性职业(比如教师),并且有单位证明,然后先可以去图书馆窗口度办一个证。开头嗰几年,要借书仲唔可以自己拣,而系工作人员攞俾你。人多嘅时候,净系等书都有排你等。嗰时,呢种情况,全国都系咁嘎啦。

不过,广图从未停止过服务街坊嘅探索。比如1985年,佢哋打开外借书区,由得市民自己去拣书;1987年,佢哋设置"汽车图书馆",用大巴将服务点送到郊区;1989年,佢哋敞开办借书证,街坊只需要凭身份证就可以即刻办理……

40年里面,一系列便民措施令广图"知识殿堂"变成咗亲切嘅"全民宝库",亦成就咗呢座广州文化地标嘅动人魅力。◎梁倩薇 编辑